Cynhaliwyd taith dywys am ddim o amgylch cyforgors enwog yng Ngwarchodfa Natur Genedlaethol Cors Caron, ger Tregaron ar 2 Chwefror i ddathlu Diwrnod Gwlyptiroedd y Byd.

Mae’r daith yn cael ei threfnu gan Brosiect Cyforgors Gymreig LIFE Cyfoeth Naturiol Cymru (CNC).

Prosiect Cyforgorsydd Cymru LIFE yw’r rhaglen adfer genedlaethol gyntaf ar gyfer cyforgorsydd ac unrhyw gynefin mawndir yng Nghymru. Mae cyforgorsydd yn cael eu henw oherwydd eu siâp cromennog ac maent yn gartref i blanhigion ac anifeiliaid prin fel lindysyn gwyfyn y gors rosy a rhosmari eiconig y gors.

Gan mai thema Diwrnod Gwlyptiroedd y Byd eleni yw ‘Gwlyptiroedd a Lles Dynol’, bydd y daith yn canolbwyntio ar ymwybyddiaeth ofalgar a manteision bod ym myd natur.

Mae’r daith yn daith gerdded yn bennaf ar lwybrau pren a bydd yn para tua awr a hanner. Fe’ch cynghorir i wisgo esgidiau addas a dillad cynnes.

Dywedodd Rebecca Thomas, Swyddog Monitro a Phrosiect Cyforgorsydd Cymru LIFE:

“Rydym yn cynnal y daith hon o amgylch Cors Caron i ddangos pwysigrwydd mawndir iach, a sut y gall treulio amser yn yr amgylchedd amhrisiadwy hwn fod yn dda i’n hiechyd.

“Mae mawndiroedd iach mewn cyflwr da yn amsugno carbon o’r atmosffer, sy’n golygu eu bod yn hynod bwysig yn y frwydr yn erbyn yr argyfwng hinsawdd sy’n ein hwynebu ni i gyd. Fodd bynnag, os nad yw mawndiroedd mewn cyflwr da maent yn rhyddhau nwyon niweidiol, gan gynnwys carbon, i’r atmosffer.”

Mae Prosiect Cyforgorsydd Cymru LIFE yn brosiect pedair blynedd uchelgeisiol sydd â’r nod o adfer saith o’r enghreifftiau gorau oll o gyforgorsydd Cymru. Bydd bron i bedair milltir sgwâr (dros 900 hectar) yn cael eu hadfer i gyflwr gwell. Mae hyn yn cynrychioli 50% o’r cynefin hwn yng Nghymru a 5% yn y DU.

Erthygl wreiddiol: Cyfoeth Naturiol Cymru